"იუნაიტედის" ახალწვეული, ანდერ ერერა, რომელიც გუნდს ზაფხულის სატრანსფერო ფანჯრისას შეუერთდა, მოხარულია იმით რომ, კოლუმბიელ გოლეადორთან ერთად უწევს თამაში.
"გულშემატკივარს ძალიან უყვარს ის, რადგან რადამელი ყოველთვის ბოლომდე იბრძვის ბურთისთვის, თითქოს ეს მისი უკანასკნელი მატჩია ცხოვრებაში. ჩვენ ძალიან იღბლიანები ვართ, რადგან ფალკაო ჩვენთან ერთადაა და დარწმუნებული ვარ სულ მალე ის გუნდისთვის უმნიშვნელოვანესი ფეხბურთელი გახდება.
ტრავმა, მოთამაშის კარიერაში ყველაზე ცუდი მომენტია. მე კარგად ვიცნობ ფალკაოს, ჯერ კიდევ ესპანეთში თამაშისას გავიცანი და ის საოცარი ფეხბურთელია. "მადრიდის ატლეტიკომ" ესპანეთის თასი მოიგო და დაამარცხა თანაქალაქელი "რეალი", რადამელი კი მატჩის საუკეთესო ფეხბურთელი გახდა, გვინდა სწორედ ასეთი ფალკაო ვიხილოთ "ოლდ ტრაფორდზეც"."
რამდენიმე დღის წინ გავრცელდა ვიდეო, სადაც ერერა და ანდერსონი მეფესავით მოაბრძანებენ ფალკაოს ვარჯიშზე, ანდერმა ამაზეც გააკეთა კომენტარი:
"მე და ანდერსონმა ეს იმიტომ გავაკეთეთ რომ, რადამელი გაგვემხიარულებინა. ჩვენ ერთი დიდი ოჯახი ვართ და ვიღწვით ერთი მიზნისკენ - ეს გამარჯვებაა.
ჩვენ გვინდა ჩემპიონთა ლიგაზე დაბრუნება. მე მსურს იქ თამაში "იუნაიტედის" მაისურით. ჩვენ ყველა ტურნირზე მხოლოდ გამარჯვებისთვის ვმონაწილეობთ და თუ მომავალ წელს ევრო ტურნირს დავუბრუნდით აუცილებლად მის მოგებას ვეცდებით."- დაასრულა ესპანელმა.