"წითელი ეშმაკების" ყოფილი მცველი ფილ ბარდსლი ფიქრობს, რომ "მანჩესტერ იუნაიტედი" მიმდინარე სეზონში ხანდახან პაბის გუნდს ჰგავდა და პრემიერ ლიგის ტიტულისთვის უახლოეს მომავალში ვერ იბრძოლებს.
ლუი ვან გაალის გუნდი პრემიერ ლიგის სატურნირო ცხრილში მეხუთე ადგილს იკავებს და "მანჩესტერ სიტის" ოთხი ქულით ჩამორჩება ჩემპიონთა ლიგის საგზურისთვის ბრძოლაში.
"ოლდ ტრაფორდის" მკვიდრებს ხშირად აკრიტიკებდნენ სერ ალექს ფერგიუსონის პენსიაში გასვლის შემდეგ და მათ ფეხბურთს მოსაწყენსა და შეტევაში უფანტაზიოს უწოდებდნენ.
"სტოკ სიტის" მცველი ბარდსლი, რომელიც "იუნაიტედის" აკადემიაში აღიზარდა, კრიტიკოსებს მხარს უჭერს და "იუნაიტედს" მოყვარულთა გუნდს უწოდებს.
"ხანდახან ჩანდა, რომ თავიანთ საუკეთესო წლებს უბრუნდებოდნენ, მომდევნო კვირაში კი შეხედავ და პაბ "ძაღლსა და იხვს" ჰგვანან.
ცოტა საწყენია, რადგან მომწონს, რომ "იუნაიტედი" ტიტულისთვის იბრძვის, თუმცა, არა მგონია, ეს უახლოეს მომავალში მოხდეს", - განაცხადა ბარდსლიმ.
30 წლის შოტლანდიელს მიაჩნია, რომ ვან გაალის გუნდმა უფრო მეტი რისკი უნდა გასწიოს და თამაშში მეტი სიმწვავე აჩვენოს.
"იუნაიტედი" ყოველთვის სიმწვავესა და შემტევ ფეხბურთს თამაშობდა. ყოველთვის მონდომებით თამაშობდნენ, მატჩს აკონტროლებდნენ, კარნახობდნენ, ანელებდნენ, აჩქარებდნენ, ბუნებრივი სიფართით თამაშობდნენ.
"სტოკი" "იუნაიტედს" თებერვალში ეთამაშა და 3-0 წავაგეთ. ეს "იუნაიტედის" საუკეთესო მატჩი იყო ამ სეზონში და სამწუხაროდ, სწორედ ჩვენ წინააღმდეგ. პასის გამთამაშებლად მაიკლ კერიკი ჰყავდათ. დეპაი ჩართული იყო, მარსიალი, ლინგარდი, ყველა ახალგაზრდა, ცოცხალი, სწრაფი ბავშვები.
მათ ხშირად ვუყურებ, როგორც კი ბურთს წინ სწრაფად და მწვავედ გაათამაშებენ, შანსს ქმნიან. მათი მატჩების უმეტესობაში კი ზედმეტად ნელები იყვნენ, ბურთს ირგვლივ ათამაშებდნენ და ძალიან დაცვით ფეხბურთს თამაშობდნენ".