მორგან შნეიდერლინი "მანჩესტერ იუნაიტედში" ახალი გამოწვევისთვის ემზადება და დარწმუნებულია, რომ ვან გაალი მას უკეთეს მოთამაშედ აქცევს.
ბასტიან შვაინშტაიგერის შეძენიდან 15 წუთის შემდეგ "იუნაიტედმა" მორგან შნეიდერლინის გადაბირების შესახებაც განაცხადა, ფრანგი ნახევარმცველი კი პირობას დებს, რომ უკეთესი ფეხბურთელი გახდება.
"მზა პროდუქტი არ ვარ. ყოველ წელს ვგრძნობ, რომ პროგრესს განვიცდი, "საუთჰემპტონის" ყოველი მწვრთნელისგან ვსწავლობდი, მაგრამ ახლა უკეთესი გავხდები, რადგან უკეთეს მოთამაშეებსა და მსოფლიოს საუკეთესო მწვრთნელთან ერთად ვიმუშავებ.
ჩემთვის ეს არის ახალი რამ, ახალი თავგადასავალი, ახალი ნაბიჯი და უფრო მომთხოვნი, უფრო დაძაბული, თუმცა ამისთვის მზად ვარ და მოუთმენლად ველოდები".
განსხვავებით შვაინშტაიგერისგან, რომელმაც აღნიშნა, რომ "იუნაიტედში" მის გადასვლაში უმთავრესი როლი თავად კლუბის სახელმა ითამაშა, მორგანი აღნიშნავს, რომ მთავარი ფაქტორი მის შემთხვევაში ლუი ვან გაალი გახდა.
"ის უდიდესი მწვრთნელია, რომელსაც მსოფლიოს საუკეთესო კლუბები ჰყავს გაწვრთნილი".
"მან მიმახვედრა, თუ რამდენად დიდია ეს კლუბი, რამდენად მნიშვნელოვანია კარგი თამაში და სწორად მოქმედება, ასე რომ, ჩემთვის მან უდიდესი როლი ითამაშა და მოუთმენლად ველოდები მასთან ერთად ვარჯიშსა და პროგრესირებას, რადგან ჯერ კიდევ ახალგაზრდა ვარ და ვიცი, აქ გაუმჯობესება შემიძლია".