ლუი ვან გაალმა პირადი წერილი გაუგზავნა და მწუხარება გაუზიარა გარდაცვლილი სკოლის მოსწავლის მშობლებს. ქალაქ მანჩესტერთან ახლოს, მიდლსტონში, 15 წლის ჩარლი ჰოლდენი, "იუნაიტედის" გულითადი ფანი და ნიჭიერი მოთამაშე მამამ სააბაზანოში გარდაცვლილი იპოვა. ამ წუთებშიც ცდილობენ ჰოსპიტალში სიკვდილის მიზეზის გარკვევას. მშობლები ფიქრობენ, რომ მიზეზი გულის შეტევა გახდა. თინეიჯერის მშობლებმა "მანჩესტერელთა" თავკაცისგან წერილი მიიღეს და მოგვიანებით ის საჯარო გახადეს:

"ყოველთვის რთულია იმის გადაწყვეტა, თუ რა უნდა თქვა ადამიანმა ასეთ სიტუაციებში. ვხვდები როგორი სასოწარკვეთილები ხართ მშობლები და თქვენი ქალიშვილი მილი, რომელსაც თქვენივე დახმარება და მხარდაჭერა სჭირდება ასეთ საშინელ მომენტში.

მე დარწმუნებული ვარ, რომ მოგონებები ჩარლისთან დაკავშირებით უკვდავი იქნება სიცოცხლის ბოლომდე, ორივეს ყოველთვის გემახსოვრებათ როგორი მშვენიერი დრო გაატარეთ შვილთან ერთად. ძალიან ვწუხვარ და ჩემი გული მთლიანად თქვენს ოჯახთანაა ასეთ რთულ პერიოდში"

ჩარლის მამამ, ლიმ განაცხადა: "მას ბევრ ადამიანთან ჰქონდა კარგი ურთიერთობა. თანაგრძნობა უამრავი ადამიანისგან მივიღეთ. ჩარლი ძალიან მხიარული და ხუმარა იყო, მას ადამიანის გაცინება ყოველთვის შეეძლო.

ეს ტრაგიკული დანაკარგია. ის ჯანმრთელი იყო და ყველაფერი წესრიგში ჰქონდა, ამან კიდევ უფრო დიდი შოკი გამოიწვია. პათოლოგისტს უბრალოდ კიდევ ცოტა დრო სჭირდება მიზეზის გასარკვევად, ამჯერად ყველაფერი გულზე მიუთითებს.

ის გამორჩეული იყო. ყველა მშობელი ასე ფიქრობს თავის შვილზე, მაგრამ ის მართლაც გამორჩეული იყო. გვინდა მადლობა გადავუხადოთ ყველას თანადგომისთვის."

წყარო: mirror.co.uk